Menü
Ostsee Zeitung | Ihre Zeitung aus Mecklenburg-Vorpommern
Anmelden
Rügen Lœpt uns eenes Dågs Kolberg denn’ Rang af?
Vorpommern Rügen Lœpt uns eenes Dågs Kolberg denn’ Rang af?
Partner im Redaktionsnetzwerk Deutschland
00:01 04.06.2016

Dit wier de ierste Gedank’. As wi dor an’n Stran’n keemen. Väl, väl breeder as irgend eener bi uns up Rügen un genau so’n fiener Sand. Eene schöne 220 m lange Seebrü’, un vör allen Dingen is se 9 m breet. Dor bruukt sich also keener vörbi drängeln, wenn he’t wer weet wie ielig hät, nah vörn an de Spitz to kåmen. Orrer wenn he gor to lang’ an’n Frühstücksdisch väl Godes för siene schlanke Lienje dånen hät un nu binåh siene Schippskort verfallen låten mütt. Bi de Kolberger Brü’ künn emm dit nie nich bleugen! Hier is äben genooch Platz. Denn ok von dor lopen „Vergnögungsdampers“ nah anne Bå’rte ut.

Vörn an de Spitz von disse Brü’ kann man sich god vermünnigen. Weil dor een schönes åpenes Restaurant anbuucht wur, do dat du gliektiedig von disse Siet eenen eenmåligen Utkiek up de lange gröne Küstenlienje geneten kannst. Rechter Hand kickt de Spitz von den’n ehemaligen Lüchttorm rœwer. Ganz in de Neech is ok de Infohrt to denn’ Marine- Stützpunkt un denn’ ollen Håben, wo vöran mihrere old upgetåkelte Schäpen up Gäst töben, de as „richtige“ Seefohrers ganz schön deep in ehre „Portjuchees“ griepen mütten. Nahst denn hoffentlich genooch Tüten an Burd hebben, wenn int Butenwåder dat Schipp orrig an to schockel fängt un enn lœsig in de Mag wården deet.

Begivst du di jetzt up denn’ Wech retur, denn beläävst du, wat du von unse Strandpromenade nich kennen deest. Woll an de teigen Målers sitten an’t Öwer orrer ståhnen an ehre Staffelei’n, üm niege Ansichten von de Küst un ehre Fischerbö’, orrer bunte Blomen up de Leinwand to bringen. Ringsüm sünd ehre mihr orrerr weniger goden künstlerischen Arbeiten utstellt, üm se an de Fru orrer an denn’

Mann to bringen.Wi hebben nich een eenzioges Mal to sehn krägen, dat Geldschiens rœwer reekent wurden. Also brotlose Kunst?

Een ganz anners künstlerisches Wark, wat hier mittenmang von all de bunten Biller hoch båben ståhnen deet, hät mi düüchdig mitnahmen! Ji weeten, leewe Lüd, dat ick as Sössteigenjöhriger noch in denn’

gruseligen Krieg trecken müsst! Doch dörch mien eegnes Todon un noch väl mihr Glück bün ick mit heeler Hut dorvon kamen. Dit grote Kunstwark hier an de Kolberger Stranpromenad’ leet mi wedder doran denken: „Denkmal der Vermählung Polens mit dem Meer“. Polnische Suldåten kunnen bit an de Ostsee vördringen!

An’n 18.März 1945 wier dat grote Blotvergehten üm disse Stadt vörbi. Alls in Schutt un Asch! Wurväl Polen un wurväl Russen un wurväl Dütsche müssten dorför int Gras bieten? Een Schoolkamerad, de sogor mit mi an’n glieken Geburtsdag har, is hier woll ümkamen. Un ick, ick kunn jetzt, in mien hoges Öller, bi liese Ostseewellen un strahlenden Sünnenschien, mi groter Freu’ in mien Hart, an dissen breeden Stran’n in groter Ruh längs wannern. Ick bün 1945 heel dorvon kamen, heff also grotes Glück hat.

Noch een Belävnis von Kolberg. As eenige Öllern sich in’n Schatten von de Strandböhm eene Paus’ günnen, hebben ehre lütteren Kinner dorför keen Uhr. Wurto sünd denn Treppenstufen dor. Wat dor båben an dat Denkmal schräben steht, kœnen se noch nich läsen. Doch utprobieren, wer so fix as mœglich bit to de bœbelste Stuf kümmt, dat makt grotes Vergnögen. As een öllerer Mann, viellicht gor de Upseher, enn dorbi stüren will, hüren se gor nich henn, wat de dor brabbelt. Se will’n sich bewägen, se willn ehren Spaß hebben. Dit gellt för alle Kinner in de ganze Welt. Grad hüt, wo ick dit schrief, an’n Kinnerdag, sullen, wi ierst recht doran denken! -wika-

OZ

Ich träumte schon als Kind davon, Förster zu werden, aber da ich durch eine Masern-Erkrankung 1941 mein linkes Augenlicht zu 90 Prozent verlor, wurde mir dieser ...

04.06.2016

Da hat ein 13-jähriger Stralsunder Mut gezeigt: Kai Gehl hat am Donnerstagabend einen Fahrraddieb überführt.

04.06.2016

Pflegeheim-Check: Analyse zeigt ein differenziertes Bild zwischen den Einrichtungen / Unterschiede fallen bei den Kosten auf

04.06.2016
Anzeige