Menü
Ostsee Zeitung | Ihre Zeitung aus Mecklenburg-Vorpommern
Anmelden
Rügen Wat kümmt nu up’t Tapet?
Vorpommern Rügen Wat kümmt nu up’t Tapet?
Partner im Redaktionsnetzwerk Deutschland
00:01 30.09.2017

De Wahl is vörbi. De Lüd’ hebben seggt, wat se nich mihr willen: uns oll Regieren. Binah 15 Perzent hebben CDU/CSU un SPD verluren. Bet nu hento süht dat so ut, as of CSU un SPD verstahn hebben, wat dat Volk seggt hett. Man Fru Merkeln dücht, dat allens so wiedergahn künn. Se hett woll nix verstahn nich. Is dat ’n Teken för de „Arroganz der Macht“? Sall dat mit ehr ok so gahn as mit Helmut Kohl?

Thorsten Filter,

Plattdeutschexperte

und Lehrer in Stralsund,

lebt in Veikvitz

He hadd’ de rechte Tied verpasst för’t Uphüren.

Nu dat de SPD beslaten hett, ’n Deel to warden von’e Wedderkraft in't Parlement, so blifft Fru Merkel bloots noch œvrig, mit FDP un de Grönen tohoptogahn. Martin Schulz, wat (noch?) de Vörsitter is von’e SPD, de séd’ den verléden Sünndagavend, dat de allens kriegen, wat se hebben willen, so lang’ dat Fru Merkel de Bas blieven kann. De beiden hebben sik noch ’n béten trüghollern, doch de sünd jieperig för dull, de willen nich „Nee“ seggen. Dorüm, leve Lésers, sullen wi uns de eens wat neger bekieken. Anfangen will ik mit de Grönen. Ümmer wenn ik an de denken do, denn kümmt mi dat Bok in’n Sinn von George Orwell, „Farm der Tiere“. He schrifft œver ’nen Bur, de lött sienen Hoff verruuglosen un de Dierter mütten för em swor arbeiden so as Slaven. Eens Dags stahn se up, jagen em von sienen Grund un ehr Léven wat béter. De Swiens warden de Vörsitters, denn de sünd de plietschsten. So bi lütten néhmen se sik ümmer mihr Macht, bet dat se dor sünd, wur de Bur vördem west is. Œvers de schinnen dat anner Veh noch duller as de olle Kierl. Up disse Manier maken de Grönen dat: Fröher wieren se dull för’e Ümwerld, de hebben sik insett't för Feddervolk un dat lüttste Wörming. Un schullen hebben se œver de CDU un FDP, dat de bloots dat Geldverdenen in’n Kopp hädden. Man hütigendags süht allens anners ut: De Windmœhlen bringen „suvern“ Strom un „schieten“ gollen Dalers as de Ésel in’n Märken. De hollen nu de Hänn’ up. Doch de doden Vagels un Fladdermüs’, de sehn se nich mihr. Ok nich de Landschoppen, de se kaputt maken mit Hunnerddusend „Palbeester“. Wenn de ringahn in’t Regieren, denn gifft dat keen Hollen mihr, denn maken se de Gesetten noch harder, dat se allerwégens up uns Rügen ’ne Windmœhl kœnen hensetten. Un wi betahlen un betahlen un denken: Nee, wat is dat schön, wi helpen all mit, uns Klima to „redden“! Christian Lindnern siene FDP (Gifft dat noch anner Lüd’ in disse Partie?), de is wedder rintrocken in'n Bundsdag. He will ok vél Nieges för uns, dat uns dat béter geht. Wat he oft von vertellt, dat is dat Digetalisieren. Internet œverall, von morgens bet avends, binnenhus un butenhus, ok binnenliefs un butenliefs? Wat sik dat schön anhürt, wi warden modern, moderner, an’n modernsten! Un denn will he mihr Geld utgéven för Sékerheid un Polizei. Œvers villicht bruukt he dat gor nich, denn wenn wi dat Internet œverall hebben don, ok bi uns in’e Wahnstuv’ (un in'e Slapstuv'?), denn kümmt dor fixing hier ’ne lütte Kamera hen un dor ok noch ene un an'n besten noch mit’n Mikrofon. In jedene Eck ’ne Kamera, de kann allens œversehn, in’n grot Kuntur sitten dusend Lüd’ vör’n Bildschirm, allens to bewaken. ’n grapschigen Deef odder anner Undœg, de hebben kene Schangs nich mihr. Kene Polizei nödig. Wi sünd séker! Man sallen de ok sehn, wenn wi unse Büxen uttrecken odder – wat noch vél slimmer is – wenn wi uns drépen don mit ’nen Kierl von'e AfD? Unse Tokunft ward allerbest!

Thorsten Filter

Quote sinkt auf Rügen im September auf 6,2 Prozent

30.09.2017
Rügen KOMMENTAR - Selbstgerecht

An einer Trennung tragen immer beide Seiten Schuld. Das dürfte bei menschlichen Partnerschaften genauso gelten wie bei politischen.

30.09.2017

Für ihr großes Engagement und das Projekt „Schulgarten und Bienen“ hat die Freie Schule Dreschvitz den Jugendumweltpreis „Ernst Boll“ des Landtages gewonnen. Die Freude bei den Schülern war riesig.

30.09.2017