Pedalritter

In uns OZ ward in latern Tiet väl oewer dat Befohr’n mit Fohrrö’ up denn Boulevar’ diskutiert. De Meinungen hiertau gahn wiet uteenanner. Uns Innenstadt is een beleiftet Ziel för uns Inheimsche, Urlaubers un Radfohrers. Nu sall’n wi Pedalritters vun Boulevar’ verswinn. Gra’ väle öllere Lü’ sünd aewers up ehr’n Drahtäsel anwiest, sünd froh un glücklich, dat sei noch nich mit een Rollator dörch de Stadt führ’n möten. De Boulevar’ is breet nauch un beid so, bi rücksichtsvollet Verholl’n, för all de Benutzer Platz. Gägensiedige Rücksichtsnahm’ süll för all sülbstverständlich sien. Dortau gehürt, dat ik as Radfohrer eis afstuig, aewers ok de Fautgänger eis een Schritt bisiet geiht un nich mit vull Afsicht vör’t Fohrrad löpt, üm tau provozier’n. Dat is mi ok all passeert, dortau müss ik mi noch leech Wür’ anhür’n. Jedet Fohrrad in uns Stadt is een Auto weniger un dröcht tau uns aller Läbensqualität bi. Een Verbot seih ik denn angemessen, wenn gröttre Veranstaltungen aller Ort stattfind’n. Vun mien Siet ut bruk dat denn ok keen Verbot. Ik un väle Radlers ward’n ehr’n Drahtäsel dann oewer denn Boulevar’ schuben. Hanning