- Bi warmet Wäder mal ‘ne echt rügensche Aaftsupp mit Klüt?

Wur ji dit güst äben läst hebben, leewe Lüd, leckt juuch glieks de Tähn? (Olles Sagwurt. Kann de Tähn oewerhaupt lecken?) Orrer hebben ji dacht — wurso kümmt he, also ick, denn nu up een Rezept? Ut wegges Book hät he dit affklurrt? Ut mien eegnes! Wat ick mi ümmer upschreef, wenn ick sülben kaokt orrer backt heff. Von lütt up an wier ick een richtiger Pottkieker un much to giern ees naschen orrer denn‘ Pott utlicken. Ass ick denn gröter un klöker wier un Mudders Geld verdeenen müsst, wir miene Upgav, jeden Dag dat Meddagäten to kaoken. Ick heff‘t giern makt un wier jedesmal ganz stolz, wenn‘t mienen kranken bettlägerigen Vadder schmeckt hät. Wi harden in‘n Rambiner Kasselvitzer Katen* eenen ganz lütten Blomengorden un tosamen mit eenen Nahwer eenen halwen Gorden för Tüffel un Gemüse. Genau up de Schee‘ (Scheide, Mittelweg) stunn een groter hoger Beernbohm (Birnbaum). Wenn in‘n tiedigen Harwst dit fiene Aavt riep wier un ganz söt schmecken de‘, geevt männigmal twischen uns Jungs ok däächten Striet: „Leeg de Beer, de du güst äben in dienen Korf packt häst, nich een bäten mihr up unsern Acker? Denn gehürt se mi. Lang‘ se man glieks roewer! Süss ist‘ Bedruch!“ De Beern von den annern Boom, wurvon eenige Telgen (Zweige) bi uns oewern Tuun hungen, kunn man nich glieks äten. Se müssten, nahdäm se riep wiern, noch ierst muddeln (nachreifen). Orrer, wenn de harte Harwststorm se runner räten har un dordoerch Bruuschen kregen, wurden disse schlichten Stellen bi‘t Schällen rutschnäden, alls in lütte Stücke deelt un eene gode Supp dorvon kaakt. Egal, ob Beern, Schwetschen orrer Kirschen — för miene Klüt heff ick twee Rezepte utprobiert un natürlich upschräben . Dat ierste nöömt ick „Mählklüt“: een half Pund Mähl, also 250g, twee Poseritzer XXL-Eier, eenen groten Ätloepel hoch vull Zucker, 1/8 l Melk. Alls god vermengeliern, am leichtesten geht‘ mit de Koekenmaschin, un denn mit twee mählige Ätloepels eene lütte Portsjon von denn‘ Deech in denn‘ groten Pott mit de kakende Supp glieden laten. Nahst probiern, ob‘t ok soet genooch is — oewer Pass Achtung: Nich dat Mul verbrennen! Mien tweetes Rezept, nämlich „Wribbelklüt“ makt nich soväl Arbeit un kann man ok för eene gode Melksupp gebruken: 125g Mähl, wedder een grotes XXL-Ei ut Poseritz, eenen Ätloepel Zucker — un wer‘t mag, eene Messerspitz Zimt. Alls god vermengeliern un denn nah un nah enen lütten Klump twischen beide Händ‘ wribbeln un in de Supp glieden laten. Wer dit kläbrige Tüüchs nich mang siene Poten wribbeln mag, kann‘t ja ok mit de Koekenmaschin versöken. Oewer nich so fix instelln, süss kunn‘t een groter Klumpatsch warden! Weggern disse ganze Arbeit väl toväl is, de kann ja statt de goden Klüt, ok unnerscheedlichste Orten von Nudeln för de Aaftsupp nähmen. Viellicht de billigsten ut denn‘ Supermarkt, de von Italien kamen. Na, denn eenen goden Sommer för juuch un goden Appetit wünscht Nokixel: *Katen — gehörte der Gutsherrschaft „von Harder“ in Kasselvitz, daher der Name. Hier wohnten in sehr beengten Räumen acht Familien mit ihren Kindern, wofür ihnen auch noch gutes Geld abgeknöpft wurde. Was sie aber auf dem Gut, trotz schwerster Arbeit, kaum oder gar nicht verdienten -wika-